::أوزار فكر حر::
 
مكتبة الصورالرئيسيةجديد أوزاربحـثmp3 mizالتسجيلدخولzrbaSlow
<div style="background-color: #000000;"><a href="http://www.rsspump.com/?web_widget/rss_ticker/news_widget" title="News Widget">News Widget</a></div>

شاطر | 
 

 مفهوم الاسـهـم

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
منبطه تس
زائر
avatar


مُساهمةموضوع: مفهوم الاسـهـم   الجمعة 31 أكتوبر - 11:44

,



موضوع لـ : منبطة تسبدي ـ اشرح فيه بشكل مبسط مفهوم الاسهم



لنفرض أن لديك مبلغ 100 ألف ريال تريد إستثمارها في مشروع ما ، ليدر عليك الربح على فترات منتظمة.
بحثت وبحثت ثم بحثت, ووجدت أن أنسب مشروع هو فتح بقالة بهذا المبلغ, قمت بإجراء الترتيبات اللازمة, السجل التجاري, الترخيص, الفيز للأجانب, وأخيرا البضاعة.
تم الإفتتاح, وبدأ البيع. مر الشهر الأول, خسارة بالطبع, ومرة الثاني, هذه المرة ربح, وانتهت السنة الأولى بصافي ربح 10 آلاف ريال.

ممتاز جدا, 10% خلال سنة.

مرت السنة الثانية, إرتفع الربح إلى 20 ألف ريال, أي مايمثل 20% من رأس المال.

جت السنة الثالثة, ولكن البقالة تريد من يهتم لها ويراعيها .
فكرت أنه من المناسب إدخال شريك معك يدير لك البقالة, فاتفقتوا أنه سيساهم بما يساوي 50% من رأس المال, أي 50 ألف ريال, الآن أصبحت البقالة شركة مساهمة, يملكها شخصان, كل شخص يملك سهم بقيمة 50 ألف ريال, وهذا يعني أن الأرباح ستوزع بالمناصفة بينكما.


طيب مرت السنة الرابعة, وكان توفيق الله, ووصلت الأرباح إلى 30 ألف ريال ، تم توزيع الأرباح وانتهينا.

ممتاز.


طيب واحد من عندكم شاف أن البقالة تدر المال الوفير, جاء هذا الواحد إلى أحدكم, وقال له: شوف يابو الشباب, انا اريد اشتري سهمك بمبلغ 55 ألف ريال

دخل عرض, مكسب 5 آلاف ريال, وغير الأرباح اللي خذتها من قبل حقة البقالة, يالله توكلنا على الله وبعنا.


كذا صار سعر سهمكم ب 55 آلاف ريال, لان لو يجي واحد ثاني لشريكك, شريكك له الحق يبيع ب 55 الف ريال, وش معنى خويي يبيع ب 55 ألف وانا لا؟.


طيب مرت الحين السنة الخامسة, بس ماش, خساير في خساير, والسادسة بعد, خوينا اللي شرا قال الله لا يعيد ذاك اليوم, انا ببيع سهمي, يروح لواحد من اخوياه, يا خويي تشتري سهمي؟ افا ليه؟ ياخي خساير, اوكي اشتريه, بس دام بقالتكم ماتجيب شي, بشتريه منك بمبلغ 30 ألف ريال, تبي ولا بكيفك,
اوكي ببيع, صار سعر سهمكم الحين ب 30 الف ريال, لان بقالتكم خسرانة ماتجيب شي.


خل نفرض ان اللي شرا بثلاثين بطران, وعنده فلوس, وعنده بعد نظر, فقال لازم نطور البقالة, اوكي هذا طور وتعدل الوضع, وبدت تجي الارباح, شي اكيد ان لو احد يبي يشتري السهم بيشتريه بسعر اغلى, صح ولا لا؟

اذا ماتعرف الاجابة, ارجع اقرا الموضوع من اول.


طيب فرضا هالبطران قال نبي نفتح فروع لهالبقالة, ونخليها سلسلة سوبر ماركت زي السيفوي (مأمل واجد) بس ماعنده المبلغ اللي يغطي هالمشروع.
والحل؟
احد الحلول انه ياكل تبن ويسكت.
حل ثاني يروح لاخوياه وربعه ويعرض عليهم الفكرة, ويقول شاركونا, نبي مبلغ 400 الف ريال, يعني بنعرض ثمان اسهم, كل سهم قيمته 50 الف ريال, وكل واحد له نسبته من الارباح حقة البقالة

اخوياه اقتنعو وعطوه الفلوس, صار راس المال 400 الف ريال + 100 الف ريال الاساسية.

مشت الامور, وصار كل واحد ياخذ ربحه سنويا.


واحد من الشركاء يبي يتزوج بس ماعنده فلوس, فا ماله الا يروح لواحد من الناس يعرض عليهم يشتري السهم بمبلغ 55 الف ريال. ونفس القصة اللي فوق تتكرر. الارباح تحدد سعر السهم.

طيب فيه حالة ثانية, السيفوي حقنا ماشي, ويدخل ارباح تمام التمام, بس خل نفرض ان كل الشركاء يبون يتزوجون, ويبون فلوس. وش بيسوون؟ الكل بيعرض سهمه للبيع.
وفرضا مافيه شرائين, مصيبة!
لان العرض اكثر من الطلب, وهذا يحدك انك تنزل من سعر السهم عشان تبيعه, فا مالك الا تعرضه ب 40 الف ريال وياقلب لا تحزن. كذا طاح سعر سهمكم, والكسبان المشتري.


حالة ثانية, كلهم هونوا عن الزواج, لكن جاهم واحد يبي يشتري بالغصب, انت كذا يحق لك تتدلع, تقول له تبي تشتري بستين الف ولا بالطقاق! ارتفع السعر الحين, لان الطلب اكثر من العرض. محد يبي يبيع بس فيه مشترين.

حالة ثالثة, الشركاء اتفقو انهم يفتحون فرع عاشر, وفرضا هالخبر تسرب للناس, وواحد من هاللي سمعو بالخبر بيجي للشركاء يعرض عليهم انه يشتري السهم بمبلغ اعلى نسبيا.

حالة رابعة, مجموعة ناس ثانيين قررو انهم يفتحون سلسلة سوبر ماركت تكسر الدنيا, وعرضو للناس انهم يشتركون معهم, هذا بيضركم انتم, لان ذوليك ناوين شر. فا سعر سهمكم بينزل.

طيب يكفي من الامثلة التخيلية. ولندخل بمثال واقعي.

حنا عندنا شركة كبيرة مرة, راس مالها يتعدى المليار ريال, قررنا نفتح شركة بيتروكيماويات مثلا (الصحراء مثلا) أو شركة اتصالات تقدم خدمات الاتصالات (اتحاد الاتصالات مثلا) بس ماعندنا هالمبلغ. وش نسوي؟

نروح لوزارة التجارة, ونقول لهم عن فكرتنا, يعطونا التراخيص اللازمة عشان نفتح الشركة ونخليها شركة مساهمة عامة, بعدين نروح للجرايد نعلن عن هالشي, ونطلب من الناس انهم يساهمون معنا (هالعملية هي اللي اسمها الاكتتاب)
طبعا كمية الاسهم المطروحة كبيرة مرة, والمبلغ رخيص, فا عامة المواطنين راح يتوجهون للبنوك عشان يكتتبون,


سؤال يسدح نفسه, وش يحدني اروح اكتتب معهم؟

عدة اجوبة, بعضهم يروح يكتتب عشان يضارب فيها في سوق الاسهم.
بعض الشيبان يكتتب باسم عياله ويخليها لهم وللزمن, بحيث انه يستفيد من الارباح السنوية, ولو حصل شي للابو يكون عندهم هالحصة بعد عدد من السنوات.

طيب, سالفة اني اروح ادور ناس يشترون اسهمي هذي مشكلة, صعبة اني بلف على العالم اقول لهم اشترو. طيب والحل؟

الحل بسوق الاسهم, او البورصة, مكان يتجمعون فيه كل الناس, ويطرحون اللي عندهم من الاسهم للبيع او للشراء



منقول للكاتب (منبطه تسبدي )
الرجوع الى أعلى الصفحة اذهب الى الأسفل
 
مفهوم الاسـهـم
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
::أوزار فكر حر:: :: المدرسة المغربية : بكالوريا :: أوراق مدرسية-
انتقل الى: